Frá stofnfjáreiganda

Við vorum beðin um að koma eftirfarandi á framfæri frá stofnfjáreiganda:

 

Kæru stofnfjáreigendur í Byr-sparisjóði. 

Í bréfi frá Íslandsbanka til stofnfjáreigenda Byrs-sparisjóðs, sem skulda bankanum,  dagsettu 8. júní 2009, kemur fram að greiða skuli upp höfuðstól og vexti af lánum teknum hjá Glitni hf í desember 2007, til fjármögnunar á stofnfjáraukningu í BYR-Sparisjóði. 

Þessi krafa tel ég að sé ekki í samræmi við þann samning, sem gerður var á milli BYR-Sparisjóðs og Glitnirs hf um fjármögnun stofnfjáraukningar BYR-Sparisjóðs, en sá samningur var gerður haustið 2007. Ég tel að í þeim samningi komi fram, að greiða skuli ofangreint lán með arðgreiðslum frá BYR-Sparisjóði. 

Rökstuðningur minn er þessi. 

1. Til að hægt hefði verið að greiða lánið upp með tveimur arðgreiðslum eins og lánasamningurinn hljóðar uppá, þá hefði arðgreiðslurnar þurft að vera samtals 120% á tveimur árum. Það er í hæðsta máta mjög óraunhæft markmið og ótrúlegt að fullorðnir menn hafi samið um þetta í alvöru. 

2. Mér var veitt lán að upphæð 94 miljónir. Engin könnun var gerð á tekjum mínum eða greiðslugetu, sem sannar að Glitnir hf reiknaði ekki með öðrum tekjum en arðgreiðslu frá Byr-sparisjóði til greiðslu skuldarinnar, enda hef ég svo til eingar aðrar tekjur, allavega ekkert sem dugar upp í svo háa skuld. 

3. Glitnir hf lánaði til einkahlutafélaga sem hafa engar aðrar tekjur en væntanlegar arðgreiðslur, sem þýðir að treyst var eingöngu á arðgreiðslur til greiðslu skuldarinnar. 

Íslandsbanki hf hefur frá og með 15 okt. 2008 tekið við öllum réttindum og skyldum sem Glitnir hf hafði gagnvart okkur, og er því eðlilegast að væntanlegar afborganir okkar af lánunum séu bundnað við arðgreiðslur frá Byr-sparisjóði. 
 

Ath: Ég er ekki löglærður maður, þannig að þessi orð eru eingöngu byggð á réttlætiskennd minni. 

Athugasemdir

[Stofnfjáreigandi (IP-tala skráð) 22.6.2009 kl. 14:22]

Sæll Sveinn

Ég er stofnfjáraðili í Byr og nokkuð skuldsettur eftir síðustu aukningu, þó svo að ég muni lifa það af hvernig sem fer. Ég hef fylgst með störfum þínum af áhuga og margt sem mér finnst að þú hafir komið fram með, eigi rétt á sér. Hinsvegar verð ég að játa að í kringum aðalfund Byrs fannst mér  að geislabaugurinn hafi minnkað töluvert hjá þér Sveinn.

Margt finnst mér ruglingslegt sem fram er komið og því tel ég nauðsynlegt, ekki síst í anda þess heiðarleika sem þú hefur boðað, að þú gerir grein fyrir eftirfarandi:

1. Í yfirlýsingu dagsettri 29.4.2009, sem kemur fram hér á síðunni segir: „að í stjórn sparisjóðsins og æðsta stjórnendateymi verði einungis skipað grandvart og heiðarlegt fólk sem tilbúið er að vinna af trúmennsku í þágu fyrirtækisins, án þess að persónulegir hagsmunir viðkomandi eða annarra fyrirtækja þeim tengdum gangi þar framar“. Þann 1. maí síðastliðinn sendir þú tölvupóst á nokkra stofnfjáreigendur samkvæmt umfjöllun fjölmiðla, þar sem verið er að skipuleggja yfirtöku á stjórn Byrs, í samráði við Skilanefnd Landsbankans og þáverandi stjórnarformann Byrs, Jón Kristjánsson hjá Sund/IceCapital. Er þetta dæmi um heiðarleika og grandvör vinnubrögð?

2.  Þegar ég  sá uppstillingu frambjóðenda á A-lista til stjórnar Byrs á síðasta aðalfundinum, varð ég fyrir verulegum vonbrigðum með að þú hafðir  stillt sjálfum sér í fyrsta sæti listans. Það var ekki í anda fyrri yfirlýsinga. Hinsvegar verð ég að hrósa þér fyrir að hafa fengið Hörð Arnarsson í framboð og það hefði verið frábært að fá  hann í stjórn Byrs. Hinsvegar voru tveir aðrir frambjóðendur sem vöktu athygli mína og tel ég miður hæfa. Eins og kom fram í fjölmiðlum voru samskipti skilanefndar og Arnars Bjarnasonar óeðlileg. Telur þú að sala á hlut skilanefndar til Arnars hafi verið í anda heiðarleika, faglegra og grandvarra vinnubragða?

Síðan er frambjóðandi A-listans í 4 sæti, Svanhildur Nanna Vigfúsdóttir. Veist þú ástæðu starfsloka  Svanhildar hjá Kaupþingi og Straumi? Það vill svo til að ég veit um raunverulegar ástæður þess en þætti gaman að heyra þína skýringu á því máli. Ætla í það minnsta að gefa þér kost á heiðarlegu svari. Einnig eru að koma fram í fjölmiðlum þessa dagana umfjöllun um sölu Skeljungi frá Glitni til Svanhildar og eiginmanns hennar. Þekkið þið bakgrunn þess máls og ef svo er telur þú að  þar séu grandvör vinnubrögð á ferð?

3. Varðandi umboð Kaupþings í Luxemburg og Karen Millen. Mér skilst að þú ásamt fleirum viljir meina að umboðið sé ólöglegt og í öðru lagi meina að atkvæðin hafi verið nýtt í þágu B-listans á síðasta aðalfundi. Hvernig veistu þetta? Hefur þú sem stjórnarmaður í Byr beitt þér fyrir því að skoða hvaða lista stofnfjáreigendur kusu. Er slíkt eðlilegt? Að þessu sögðu þá langar mig líka spyrja þig hvort þú hafir kannað hver fór með umboð fyrir bréf sem voru í vörslu Landsbankans í Lúxemburg og hver beitti þeim atkvæðum á aðalfundinum? Samkvæmt mínum heimildum var það einhver á vegum Jón Kristjánssonar, fyrrverandi stjórnarformanns Byrs. Hefur þú kannað þetta og lögmæti þess? Skora á þig að fara ofan í saumanna á þessu.

Að lokum. Mér finnst eðlilegt í alla staði að rétt sé að málum staðið. Vinnubrögð eiga að vera fagleg og opin. Það þarf hinsvegar að gilda um alla, ekki er hægt að boða heiðarleg og grandvör vinnubrögð með hægri hendinni á meðan sú vinstri gengur þvert á þann boðskap. Ekki satt?

Gangi ykkur vel í baráttu ykkar, okkur stofnfjáreigendum til heilla.

[Gísli Ásgeirsson (IP-tala skráð) 22.6.2009 kl. 15:01]

"Það er í hæðsta máta mjög óraunhæft markmið og ótrúlegt að fullorðnir menn hafi samið um þetta í alvöru. 

2. Mér var veitt lán að upphæð 94 miljónir. Engin könnun var gerð á tekjum mínum eða greiðslugetu..."

Mér finnst þessi tilvitnun í bréf stofnfjáreigandans segja meira um hann, og hugsanlega aðra, sem tóku lán á svipuðum forsendum, en margt annað.

En gangi ykkur annars vel í ykkar baráttu.