VBS og ársreikningurinn 2008

Það er mjög áhugavert að skoða ársreikninga VBS fjárfestingabanka.  Í stjórn VBS fjárfestingabanka sátu á árinu 2008 m.a. Páll Þór Magnússon, Jón Kristjánsson (mágur Páls), Birgir Ómar Haraldsson og Símon S. Sigurpálsson, sjá mynd hér að neðan:

Þrátt fyrir að Birgir Ómar Haraldsson sé sagður í stjórn VBS skrifar hann nú samt ekki undir ársreikning VBS fyrir árið 2008, heldur Willum Þór Þórsson.   Vekur óneitanlega athygli og væri gaman að fá skýringar á hjá forsvarsmönnum VBS.  Ekki síst í ljósi þess að Birgir Ómar þáði 1.740 þúsund fyrir stjórnarsetu á árinu 2008.  Willum Þór Þórsson þáði ekki krónu - nema hann eigi hluta af þeim 180 þúsundum sem fóru til varamanna. 

Það væri áhugavert að heyra frekari skýringar á því hversvegna Birgir Ómar fer svo snögglega úr stjórn VBS að vefumsjónarmanni fyrirtækisins hafi hreinlega ekki gefist tími ennþá til að leiðrétta vefsíðuna með upplýsingunum um stjórnina. 

Þá væri áhugavert að fá að heyra hvenær á árinu 2008 Símon S. Sigurpálsson seldi hlut sinn í VBS, en eignarhlutur hans í VBS fór úr 592 hlutum um áramót 2007-08 (ársreikningur VBS 2007) í akkúrat NÚLL við áramót 2008-09.  Ekki væri síður áhugavert að vita hvaða félag hafi keypt hluti Símonar.  Í ljósi þess að það var IceCapital ehf sem keypti hlutina í Byr af þeim Jóni, Páli og Símoni gæti maður spurt hvort IceCapital hafi jafnvel lagt í enn meiri fjárfestingar þarna?  Nú, og þá má aftur spyrja hvar IceCapital hafi fengið fjármagn til kaupanna - vonandi ekki hjá Byr, með veði í bréfum VBS - það er nefnilega spurning hvers virði bréfin í VBS eru.....Sem leiðir aftur hugann að því að áhugavert væri að vita á hvaða verði Símon seldi bréfin sín.......

Að lokum væri sérstaklega áhugavert að fá álit stjórnvalda á sölu stjórnarmanna VBS á hlutum sínum í Byr (Páll Þór Magnússon, stjórnarformaður VBS, Birgir Ómar Haraldsson (aðalstjórn VBS skv. heimasíðu), Jón Kristjánsson (varastjórn VBS skv. heimasíðu) og Símon S. Sigurpálsson (varastjórn VBS skv. heimasíðu) seldu allir mikið af hlutum í Byr eftir hrun bankanna. 

Kveðja,

Sveinn og Rakel

 

 

 

Athugasemdir

[Stofnfjáraðili (IP-tala skráð) 12.4.2009 kl. 03:50]

Það er kostuglegt að fylgjast með þessu bloggi ykkar. Ég hef sjaldan skemmt mér betur yfir einu bloggi. Ég er ekki að grínast.

Ég vil taka það fram að mér finnst frábært og nauðsynlegt að til sé fólk sem rannsakar málin í kjölinn hvort sem það er í viðskiptalífinu eða annarsstaðar. Ekki sýna fjölmiðlar þessu allavega áhuga. Það er t.d. ekki til neitt sem heitir rannsóknarblaðamennska á Íslandi, og það er miður!

En aftur að blogginu ykkar og framkomu ykkar í fjölmiðlum. Hún er auðvitað í besta falli hlægileg. Sveinn heldur því m.a. fram að hann sé með doktorspróf í verkfræði. Ég kaupi það ekki þegar stærðfræðiþekkingin er á borð við eitthvað sem aldrei kæmist í gegn á samræmdum grunnskólaprófum. Ég fer nánar út í það síðar. Að nota svo DV sem heimild er líka afar barnalegt. Þið þyljið síðan upp tölur úr ársreikningum en þið hafið augljóslega aldrei lesið ársreikninga áður. Þið teljið síðan að fjármálafyrirtæki séu nauðsynlega í eigin stöðutöku þegar þau eiga bréf í tilteknum félögum, sem allir sem hafa komið nálægt viðskiptum vita að er ekki nauðsynlega rétt því það getur hæglega verið afleiðusamningur eða álíka sem gerir það að verkum að formlega séð er fjármálafyrirtækið skráð sem eigandi án þess að vera það. Fjármálafyrirtækið er á eigendalistanum því það er að verja sig gagnvart breytingum á gengi. Loks eru það veðköllin (e. margin calls) sem þið hrasið um.

Flokkum þetta aðeins niður:

1. Vanþekking á lestri ársreikninga/Vankunnátta í stærðfræði.
Þið skautið í gegnum ársreikninga eins og enginn sé morgundagurinn. Þið haldið því fram að Símon Sigurpálsson eigi 592 hluti í VBS, að Ágúst Sindri Karlsson eigi 4200 hluti í MP banka og Styrmir Bragason eigi 10.000 hluti í MP banka. Þannig mætti ætla að markaðsvirði bréfa sem Símon á sé um 3800 kr., að markaðsvirði bréfa sem Ágúst eigi sé um 25.200 kr og að Styrmir eigi um 60 þúsund kr.ef miðað er við innra virði 1 (e. price to book). Nú vil ég af tvennu illu frekar líta á það sem skort á stærðfræðiþekkingu fremur en ólæsi að þið treystið ykkur ekki til að horfa til þess að á hverri blaðsíðu á báðum þessum ársreikningum stendur "Fjárhæðir eru í þúsundum króna". Því gef ég mér að það sé rangt að Sveinn sé með nokkuð meira en landspróf í stærðfræði.

2. Sannleiksgildi DV
Þið virðist telja DV vera áreiðanlegasta dagblað landsins, og haldið um leið að ykkur sé tekið trúanlega. Af sömu ástæðu og nefnd var í upphafi, þá eru fjölmiðlar afar slakir á sannleikanum. Því hefur enginn rengt þetta. DV hélt því t.d. fram að téður Ágúst væri lögmaður MP banka. Það þarf ekki annað en að fara á heimasíðu bankans til að leiða annað í ljós, mér skilst að sá sé búinn að vera lögmaður bankans síðan 2005.

3. Afleiðuviðskipti/Vanþekking í stærðfræði
Þið teljið að án nokkurs vafa sé eigandi bréfa skv. eigendalista sá sem er að taka stöðu í viðkomandi félagi. Aftur er óskiljanlegt að þið leitið ekki til þeirra sem hafa kunnáttu á efninu, hvort sem þeir hafa numið viðskiptafræði eða hagfræði, þeir hafa lært þetta út og inn trúi ég. Nú eða í versta falli einhver sem kann smá stærðfræði og hefur þó ekki nema eins dags reynslu á fjármálamörkuðum. Hvorugt virðist enn og aftur vera í farteski ykkar, heldur er talað af algjörri vanþekkingu og enginn áhugi á því að fá aðstoð við flóknari fjármálaafurðir, trúlega þyrfti líka verkfræðing til sem þið hafið augljóslega ekki aðgang að.

4. Veðköll
Ef þið hefðuð aðgang að t.d. menntuðum viðskiptafræðingi eða hagfræðingi, nú eða jafnvel einhverjum aðila sem hefur starfað á fjármálamarkaði, þá væri búið að skýra fyrir ykkur hvernig veðköllum er háttað. Veðkall er framkvæmt þegar banki telur að markaðsvirði eigna og trygginga deilt með markaðsvirði skulda sé farið að nálgast 1 of mikið (getið leitað til aðila sem hafa meira en landspróf í stærðfræði til að útskýra hlutföll fyrir ykkur). Veðkall fellst í því að þeim sem veðkallið fær þarf að leysa sín mál með einhverjum hætti, hvort sem það er með því að auka við tryggingar, selja undirliggjandi bréf, eða að finna kaupanda af bréfunum. Raunar eru fleiri leiðir færar svo sem að kaupa afleiðusamning eða eitthvað annað. Skv. því sem þið segið er veðkall það að fjármálafyrirtækið eignast bréfin. Það er rangt. Þá væri áhætta fjármálafyrirtækisins enn á bókum þess svo augljóslega er þessi leið ekki fær fyrir fjármálafyrirtæki, þó þið hafið haldið þessu fram.

En af þessu sögðu hvet ég ykkur til að halda áfram að skemmta mér og öllum þeim hafa stunda viðskipti í áratugi hið minnsta, þó svo að um vanþekkingu sé að ræða af ykkar hálfu og lélegri kunnáttu á einföldustu stærðfræði, þá er þetta skemmtiefni fyrir okkur hin.

Það væri mér hins vegar mikið gleðiefni ef þið annað hvort fengjuð ráðgjöf frá aðilum sem starfað hafa á fjármálamarkaði eða frá einhverjum sem hefur lokið meira en landsprófi í stærðfræði. Það er afar mikilvægt fyrir fjármálalífið að haldið sé uppi öflugri vakt um hvað sé að gerast á bakvið tjöldin og hvernig kaupin gerast á eyrinni, en þó ekki af fávisku og vanþekkingu líkt og er í ykkar tilfelli.

Með virðingu en vott af háði,
Fjárfestir og raunar stofnfjáraðili í öðrum sparisjóði.

[Vinur Byrs (IP-tala skráð) 13.4.2009 kl. 12:21]

SKÍTADREIFARARNIR

[Vinur Byrs (IP-tala skráð) 13.4.2009 kl. 12:28]

SKÍTADREIFARARNIR ERU MÆTTIR!!!

Ágætu hjón.  Hér að ofan hefur skíthræddur "fjárfestir til áratuga" farið á taugum, drekkt sorgum sínum og fallið í þann djúpa pitt að fara að blogga "vörn fyrir spillingu" kl. 03.50 um nóttina :-)   Þetta er í mínum huga staðfesting á því að þið eruð á réttri leið!  Látið ekki svona gæja draga úr ykkur móðinn. Ef þeir menn sem þið eruð að fjalla um hafa ekkert að fela, af hverju skríða þeir þá ekki úr holunum og skýra sitt mál?  Loga e.t.v. símalínur þeirra á milli núna í örvæntingarfullum tilraunum til að búa til "líklegar sögur" um það hvað var að gerast???

Áfram!  Réttlæti! Upprætum spillingu, ekki er FME að því!

[Haukur (Viðskiptavinur og stofnfjárerfingi) (IP-tala skráð) 14.4.2009 kl. 19:48]

Aðeins til að svara 1. athugasemd.

Gott að þú hafir skemmtun á því að tala niður til fólks. Það að hlaupa framhjá því að allar tölur séu í þúsundum hlýtur að benda til þess að fólk séu fífl og hálfvitar. Vissulega er þetta mikið skemmtiefni og sjálfsagt hægt að orna sér við að rifja þetta upp á ævikvöldinu með félögunum og skella vel og rækilega upp úr. Litlu verður Vöggur feginn.

En nóg um það. Liður 1 mun eins og áður segja eiga brýnt erindi í XVII bindi íslenskrar fyndni.

2 Vissulega er vont að hafa DV að heimildarmanni sínum, en sú staðreynd að umræddur maður sé ekki á fastri launaskrá hjá MP banka, heldur að þar sé a.m.k. einn annar lögfræðingur starfandi, sem þykir nú ekki til tíðinda í flestum bönkum, þá hvorki sannar það né afsannar að umræddur maður hafi unnið störf fyrir MP banka hvort sem er í lausamennsku eður ei. En líklega hefði verið best að spyrja manninn.

3 Sá sem er skráður fyrir bréfum er með réttu eigandi bréfa þar til að annað kemur í ljós. Það er þess, sem bréfin eru skráð á, að sýna fram á, sé svo ekki. Þar til að það hefur verið gert, er sá sem er skráður fyrir bréfunum, að lögum, eigandi þeirra. Ef alltaf væri hægt að halda fram að e.t.v. mögulega kannski séu til einhverjir baksamningar eða skuldbindingar við 3. óþekkta aðila, þá væri aldrei hægt að halda neinu fram um nokkurs manns eign. Þetta er því hreinn og klár útúrsnúniningur, en þó líklegast ekki nógu fyndin til að rata inn í áðurnefnt XVII bindi.

4 Leitt var að því líkum að yfirtaka banka á bréfum sé afleiðing veðkalla. Rétt er að veðkall þarf ekki endilega að enda við að banki leysi til sín bréf, en það kemur þessu máli einfaldlega ekkert við. Flest veðköll síðasta ársins hafa endað með yfirtöku banka á þeim, og sú staðreynd að veðköll urðu til þess að sumir misstu bréf sín til banka á sama tíma, dregur engan veginn úr líkindum þess að veðköll hafi einnig orðið til þess að bank hafi komist yfir önnur bréf. Eftir stendur fullyrðing sem þú getur væntanlega ekki hrakið: Veðkall leiðir oft til þess að fjármálafyrirtæki eignast undirliggjandi veðsett bréf.

En hættum þessum leiðindum og förum aftur að hlægja að 1000 földunar vitleysunni. Ho, ho ho!