Aðeins vikið að máli númer tvö

Ágætu lesendur! 

Við viljum, á þessum fallega vordegi, byrja á því að þakka öllum þeim sem mættu á fundinn á Grand Hóteli í gær.  Það var ótrúlega mikilvægt fyrir okkur hjónin að upplifa magnaða samstöðu fundargesta um að nú væri nóg komið!

Þá viljum við sérstaklega þakka Karli Garðarssyni fyrir góða fundarstjórn.  Karl brást mjög skjótt við beiðni okkar um að taka fundarstjórnina að sér og kunnum við honum bestu þakkir fyrir.

Þær glærur sem voru sýndar á fundinum verða lagðar inn á vefinn eftir því sem tími vinnst til.  Þar sem við hjónin erum nýgræðingar í bloggheimum kunnum við ekki að leggja inn venjuleg skjöl (t.d pdf) hér á blogg-vef Morgunblaðsins.  Athugasemdir hér að neðan sem gætu aðstoðað okkur við það væru vel þegnar. 

Eins og fram kom á fundinum var það MP-Banki sem var mikilvægasti skákmaðurinn á taflborði viðskiptanna sem Exeter Holding stóð í.  MP-Banki átti sjálfur 119.244.756 af þeim rúmu 242 milljón hlutum sem Exeter Holding tók við á stjórnarfundinum í Byr þann 7.10.2008 - strax eftir hrun bankakerfisins.  Auk þeirra hluta sem MP-Banki átti sjálfur fyrir þennan tíma var framkvæmt veðkall á stjórnendur Byrs, sem misstu við það sína hluti til MP-Banka.  Þeir hlutir fóru beint til Exeter Holding.  Stjórnarformaður Byrs, Jón Þorsteinn Jónsson, losaði sig við 54.104.865 hluti í sömu viðskiptum.  Síðar um haustið losaði svo annar stjórnarmaður í Byr, Birgir Ómar Haraldsson, sig við 64.039.876 hluti yfir til Exeter Holding.  Ekki liggur fyrir á þessari stundu hvort Jón Þorsteinn og Birgir Ómar seldu hluti sína beint til Exeter Holding eða hvort MP-Banki hafði lánað þeim (með veði í stofnfjárhlutum Byrs) og framkvæmdi veðkall, líkt og í tilfelli starfsmanna Byrs.

Þessi kaup Exeter Holding var Byr látinn fjármagna með yfirdráttarláni.  Eina veðið fyrir því láni voru stofnfjárbréfin sjálf.  Bréfin voru seld á fáránlegu yfirverði.

Tvennt ber sérstaklega að hafa í huga þegar viðskiptin á milli stjórnarmanna Byrs, þeirra Jóns Þorsteins og Birgis Ómars, MP-Banka og Exeter Holding eru skoðuð.  Það fyrra er að Jón Þorsteinn er fyrrum stjórnarmaður MP-Banka (þiggur laun fyrir stjórnarsetu á árinu 2007, er á skrá yfir stjórnarmenn 2006 (sjá ársreikninga MP, www.mp.is)).  Það seinna er að Ágúst Sindri Karlsson, aðaleigandi Exeter Holding, sat í stjórn með Jóni Þorsteini Jónssyni fram til 2007.  Ágúst Sindri sat einnig í stjórn MP-Banka á árinu 2008 og átti 4200 hluti í lok þess árs í MP-Banka.  Til samanburðar má nefna að Styrmir Þór Gunnarsson, forstjóri MP-Banka, átti 10.000 hluti í MP-Banka í lok árs 2008.

Að okkar mati er MP-Banki þarna ábyrgur fyrir vafasömum viðskiptum, auk stjórnarmanna Byrs og Exeter Holding.  Styrmir Þór Bragason [ekki Gunnarsson eins og misritaðist þegar þessi grein fór fyrst inn í morgun, (skrifað 9.4.2009 kl.14.48)], forstjóri MP-Banka, svaraði því til í Kastljósi að MP-Banki hefði engan hlut átt í þessum viðskiptum.  Ef Styrmir segir satt, væri áhugavert að fá skýringar á því hjá honum, eða öðrum forsvarsmönnum MP-Banka, hvað varð um þá 119.244.756 hluti í Byr sem MP-Banki var skráður fyrir þegar bankakerfið hrundi.  Þá væri áhugavert að fá að vita hjá Styrmi hvenær MP-Banki eignaðist þessa hluti og með hvaða hætti.  Að lokum væri snjallt hjá Styrmi að útskýra hvað hann á við með því að engin tengsl séu á milli Exeter Holding og MP-Banka.   

Kastljós:

http://www.ruv.is/kastljos/

http://dagskra.ruv.is/streaming/sjonvarpid/?file=4431357

Ársskýrslur MP-Banka má finna hér: http://www.mp.is/fyrirtaekid/utgafa/arsskyrslur

En aðeins að máli númer tvö:

Það voru fleiri stjórnarmenn í Byr en Jón Þorsteinn og Birgir Ómar sem losuðu sig við hluti í Byr eftir hrun bankakerfisins.  Jón Kristjánsson, núverandi stjórnarformaður, losaði sig við 25 milljón hluti yfir til IceCapital - sem er félag í hans eigu.  Það félag er einnig í eigu Páls Þórs Magnússonar, mágs Jóns.  Gunnþórunnar Jónsdóttir, móður Jóns er skráð sem varamaður í stjórn fyrirtækisins.  Gunnþórunn Jónsdóttir er ekkja Óla í Olís.

Páll Þór Magnússon, mágur Jóns og stjórnarmaður í Byr á árinu 2007, losaði sig einnig við 25 milljón hluti yfir til IceCapital. 

Miðbúðin ehf losaði sig svo við rúmlega 135 milljón hluti yfir til IceCapital.  Miðbúðin er í eigu Símonar S. Sigurpálssonar.  Símon og Páll Þór Magnússon eru m.a. veiðifélagar.  Eflaust eru meiri tengsl þeirra á milli, sem við hjónin höfum ekki fundið enn.

Við munum í framhaldinu útskýra viðskiptin nánar. 

Páll Þór Magnússon, Jón Kristjánsson, Símon S. Sigurpálsson og Birgir Ómar Haraldsson sitja allir í stjórn VBS-Fjárfestingabanka.  Það fyrirtæki birti ársuppgjör sitt í gær eftir mikið þóf og frestanir.  Nýlega var samþykkt 26 milljarða lán til VBS frá ríkinu, á vöxtum sem eru svo lágir að þeir nálgast að vera brandari á íslenskan mælikvarða. 

Við hvetjum alla til að skoða ársreikning VBS-Fjárfestingabanka með gagnrýnu hugarfari. 

http://www.vbs.is/files/VBS_Arsreikningur_2008.pdf

Njótið dagsins, Sveinn og Rakel

Athugasemdir

[Stofnfjáraðili (IP-tala skráð) 9.4.2009 kl. 08:53]

Sæl Sveinn og Rakel og bestu þakkir fyrir fundinn í gær!  Það var magnað að finna þar hinn mikla samhug og fordæmingu á þeim óhæfuverkum sem þið hafið verið að benda á.  Á sama tíma heyrist ekkert af FME (frekar en vant er) og á sama tíma er fjármálaráðherra að lána MP banka 84 milljarða til að geta tekið yfir "innlánasafn" SPRON, sem er auðvitað ekkert annað en tölur á blaði - skuldbinding um að greiða "innistæðueigendum" peninga sem allir eru löngu tapaðir!

Fjármálaráðherra er líka nýbúinn að lána VBS á annan tug milljarða með 2% vöxtum. Þar á bæ þakka menn pent fyrir sig með því að tekjufæra sér 9.355 milljónir á árinu 2008 vegna þessa!!!  Bíddu, það var verið að þessu núna í mars eða apríl á þessu ár, en samt leyfa menn sér að fegra ársreikning 2008 (sem á lögum skv. að gefa mynd af stöðu fyrirtækis um áramót) með gerningum sem framkvæmdir eru þegar liðnir eru um 3 mánuðir af árinu 2009.  Sigurður Jónsson endurskoðandi hjá KPMG býður uppá þetta einstaka "bókhaldstrikk". Raunar sér maður alltaf betur og betur að stóru endurskoðunarfyrirtækin léku miklu stærra hlutverk í fjármálapartýinu en fólk áttaði sig á, með allskyns eignfærslu verðmæta sem alls ekki voru til (viðskiptavild var það oftast kallað).  Nú hefur það hugtak verið tekið út úr ársreikningi VBS en þess í stað snýst nýja "trikk" KPMG mannsins um að tekjufæra "ímyndaðar tekjur" á árinu 2008 vegna þess að tekið var hagstætt lán á árinu 2009!!!  Þvílíkar sjónhverfingar, maður finnur ENRON skítalyktina blossa upp...

Ógeðfeldast er að sjá þessa drullusokka ná að blekkja opinbera aðila til að lána sér fé og selja sér eignir á slikk á sama tíma og þeir standa í svona drullumalli. 

Góðar stundir.

[Lesandi (IP-tala skráð) 9.4.2009 kl. 11:35]

Takk kærlega fyrir skrifin ykkar. Þetta er ótrúleg frásögn af subbuskap og siðleysi.

Annað sem ég tek eftir.... þessir aðilar eru að fá fyrirgreiðslu ...EFTIR að minnihlutastjórn Framsóknar - Vinstri-Grænna - og Samfylkingar er tekin við ....

Er ekki sama sem sagt hver stendur fyrir spillingunni..? - Hvort er betra að hafa spillingu Sjálfstæðismanna +Framsónar eða Sjálfstæðismanna +Samfylking..

eða

Samfylkinguna +Vinstri Grænir +Framsókn..??

[jón (IP-tala skráð) 9.4.2009 kl. 12:47]

það er augljóst að vitleysan heldur áfram ef ekki koma til menn eins og Sveinn og benda á hana. Mér finnst að fjölmiðlar verði að aðstoða svona hugrakkt fólk sem þorir að benda á ranglætið og afhjúpa spillinguna. VBS tapaði nýverið milljarði til enskra aðila, er þetta siðferðilega verjandi að ríkið með skattfé almennings komi slíku fyrirtæki til hjálpar? kveðja jón

[Helga (IP-tala skráð) 9.4.2009 kl. 13:01]

Það var áhugavert að hlusta á fréttir RÚV í hádeginu. FME er að rannsaka málið. Aha, og hvað... málið er dautt??? Er ekki verið að lægja öldurnar, telja fólki trú um að allt sé í góðum gír. FME er að rannsaka málið ... Ég tel að leiðin sem Sveinn og Rakel eru að fara sé sú eina rétta. Einstaklingar verða að taka af skarið. Er líklegt að stjórnvöld eða aðrar stofnanir þeim tengdar taki ábyrgð á að rannsaka málin þegar þau treystu sér ekki til að standa upp og taka ábyrgð á hruninu og vitleysunni í aðdraganda þess?

[Páll Einarsson (IP-tala skráð) 9.4.2009 kl. 13:05]

Takk kærlega fyrir þetta góða framtak að veita þessum köllum aðhald og koma upp um þessa spillingu.

[Hörður (IP-tala skráð) 9.4.2009 kl. 14:12]

Styrmir Þór er þokkalega Bragason, ekki Gunnars.

[Sveinn Margeirsson (IP-tala skráð) 9.4.2009 kl. 14:45]

Hárrétt, ég fór rangt með föðurnafn Styrmis Þórs. Laga það.  Þakka ábendinguna.