Yfirlýsing Jóns Þorsteins Jónssonar

Vakin er athygli á yfirlýsingu Jóns Þorsteins Jónssonar:

Yfirlýsing frá Jóni Þorsteini Jónssyni, fyrrverandi stjórnarformanni Byrs

Skrifað þann 11. apríl 2009

Vegna umfjöllunar fjölmiðla um málefni Byrs sparisjóðs, vil ég koma eftirfarandi á framfæri sem fyrrverandi stjórnarformaður sparisjóðsins:

Eins og margir aðrir á undanförnum árum, undirgekkst undirritaður á hendur persónulegar skuldbindingar vegna hlutafjárkaupa. Í lok sumars 2008 var fyrirséð að stutt yrði í að verðmæti hlutabréfa minna færi niður fyrir skuldsetningu þeirra. Því tók ég þá ákvörðun í septembermánuði síðastliðnum, að gera upp allar mínar skuldbindingar gagnvart MP Banka. Vildi ég með því koma í veg fyrir frekara tap af fjárfestingum mínum. Fólst í því framsal á stofnfjárbréfum í Byr, öðrum hlutbréfum og að auki greiddi ég bankanum töluverða fjármuni í reiðufé. Því blasir við fyrir að ég bar töluvert tap af þessum viðskiptum, en hagnaðist ekki.

Uppgjörið átti sér stað, sem fyrr segir, í september 2008, en í þeim mánuði var enginn stjórnarfundur hjá Byr sparisjóði. Viðskiptin voru hins vegar formlega staðfest á stjórnarfundi þann 7. október 2008, sem var fyrsti fundurinn eftir fyrrgreint uppgjör mitt við MP Banka. Þetta hefur valdið þeim leiða misskilningi að viðskiptin hafi átt sér stað í október, þegar þau í raun fóru fram í september. Í millitíðinni áttu sér stað þau boðaföll sem við öll þekkjum á íslenskum fjármálamarkaði, sem endaði með falli viðskiptabankanna.

Látið hefur verið að því liggja að gengið í þessum viðskiptum hafi verið hærra en eðlilegt mætti teljast. Hið rétta er að þegar fyrrgreint uppgjör fór fram, var eigið fé Byr sparisjóðs um 46 milljarðar króna. Svonefnt Q-hlutfall í viðskiptunum (markaðsverð/eigið fé) var því í kringum 1,2 en ekki 3,5 eins og ranglega hefur verið haldið fram. Það er enn fremur alrangt að ég hafi fengið einhvers konar sérmeðferð í viðskiptum mínum við MP Banka. Þvert á móti þurfti ég að taka á mig umtalsvert tap til að gera upp viðskipti mín við bankann.

Því hefur enn fremur verið haldið fram að undirritaður tengist með einhverjum hætti félaginu Exeter Holding sem keypti umrædd stofnfjárbréf af MP Banka. Hið rétta er að engin fjárhags-, eigna- eða hagsmunatengsl eru á milli mín og félagsins og hafa aldrei verið. Það er mér með öllu óviðkomandi og furða ég mig á því að slíkum rangfærslum hafi verið komið á kreik.

Segja má að eftir að á að hyggja hefði verið heppilegra að Byr sparisjóður hefði leitað frekari trygginga vegna lánveitinga sparisjóðsins til áðurnefnds Exeter Holding. Það var því miður lenska í bankakerfinu á síðustu árum að veitt væru lán, eingöngu með veðum í þeim bréfum sem fjárfest var í. Ljóst er að öll fjármálafyrirtæki þurfa að draga af því nauðsynlegan lærdóm. Ég, sem fyrrverandi stjórnarformaður Byrs sparisjóðs, tek að sjálfsögðu á mig minn hluta ábyrgðarinnar á því sem kann að hafa mátt betur fara. Það er jú alltaf auðvelt að vera vitur eftir á, eins og við þekkjum flest.

Ég vil að lokum árétta að ég hef í öllum mínum störfum fyrst og fremst borið hag Byrs sparisjóðs, starfsmanna hans og stofnfjáreigenda fyrir brjósti.  Grunnrekstur Byrs sparisjóðs hefur til allrar hamingju gengið vel, á meðan margar lánastofnanir hafa því miður fallið í valinn. Ég veit að Byr sparisjóður mun standa sterkur áfram á íslenskum fjármálamarkaði, og það er einlæg von mín að sem flestir stofnfjáreigendur sjái sér fært að mæta á aðalfund Byrs sparisjóðs, sem haldin verður þann 13. maí næstkomandi, kl. 16:00 að Hilton Hótel Nordica í Reykjavík.

Virðingarfyllst,
Jón Þorsteinn Jónsson

http://www.byr.is/byr/um_byr/frettir/?cat_id=16&ew_0_a_id=620

 

Athugasemdir

[Eiríkur Ingvar Ingvarsson, 11.4.2009 kl. 17:14]

Þetta kom á óvart að sjá, í ljósi frétta síðustu daga...

http://www.endurreisn.is/hagvoxtur/drog/velferd-byggd-varanlegum-grunni-birgir-omar-haraldsson/2/

[Einar (IP-tala skráð) 11.4.2009 kl. 18:50]

Yfirlýsingin kemur í sjálfu sér ekki á óvart. Hér stígur fram fyrrverandi stjórnarformaður sparisjóðsins og gerir hreint fyrir sínum dyrum.

Að mínu mati fær hann hrós að hafa stigið þetta skref. 

[Sveinn Margeirsson og Rakel Gylfadóttir, 11.4.2009 kl. 21:02]

Já, mjög gott að Jón Þorsteinn stígur fram og skýrir sölu bréfa sinna.  Jón Þorsteinn segir mjög skýrt að hlutur hans hafi farið til MP-Banka, þ.a. út frá yfirlýsingu hans er ómögulegt að skilja annað en að MP-Banki hafi selt Exeter Holdings beint. 

Það að MP-Banki hafi selt Exeter Holdings beint stangast hinsvegar mjög á við yfirlýsingu Margeirs Péturssonar hér á vefnum og í fjölmiðlum sömuleiðis á við orð Styrmis Þórs, forstjóra MP, í Kastljósinu.  Tilvitnun í Styrmi Þór er eftirfarandi: "Styrmir sagði hlut MP-Banka í umræddum viðskiptum engan".

[Ólafur Björnsson (IP-tala skráð) 12.4.2009 kl. 19:28]

Ég held að stofnfjárhafar þurfi ekki að hafa áhyggjur af þessum manni,  Hann hefur sýnt það í störum sínum fyrir SPV og nú BYR að hann er traustsins verður,

Faðir hans á nú stóran þátt í hversu vel SPV. dafnaði á sínum tíma.

 Ég ber fullt traust til hans.  Einn af fáum sem hafði vit á að stíga umsvifalaust til hliðar til að sinna öðrum málum sem sköruðust á við störf hans hjá Sparisjóðnum

KV

Óli